Լուրերու Արխիվ

april 24

Ապրիլեան Եղեռնի 102-Ամեակի Հսկում

Կազմակերպութեամբ ՀՅԴ ԼԵՄ-ի «Շաւարշ Միսաքեան» մասնաճիւղին, Կիրակի 23 Ապրիլ 2017-ի երեկոյեան ժամը 8:00-ին, Այնճարի մէջ տեղի ունեցաւ Ապրիլեան եղեռնի 102-ամեակի հսկում:

Հսկումին առաջին բաժինը տեղի ունեցաւ «Հետուիկ» սրահին մէջ: Ձեռնարկը ընթացք առաւ Լիբանանի եւ Հայաստանի քայլերգներով, որմէ ետք ՀՅԴ ԼԵՄ-ի «Շ. Միսաքեան» մասնաճիւղի խօսքը արտասանեց ընկ. Կարէն Անտոնեան: Ան ներկաներէն խնդրեց մէկ վայրկեան յոտնկայս յարգել յիշատակը Հայոց ցեղասպանութեան մէկուկէս միլիոն նահատակներուն:

Ընկ. Կարէն ըսաւ: «Հայ ժողովուրդի կոտորածները կը կազմէին Օսմանեան պետութեան Հայաստանը հայաթափ ընելու քաղաքականութեան հիմնական ուղղութիւնը, բայց դիւային այդ ծրագրիրին գործադրութիւնը գլխաւորաբար սկսաւ 1915 Ապրիլ 11-14 ձերբակալութիւններով ու սպաննութիւններով արեւմտահայ գրողներու, բանաստեղծներու, արուեստագէտներու, գիտնականներու, քաղաքական և կուսակցական ղեկավարներու և մանաւանդ երիտասարդ խաւին: Այդ դէպքերուն անմիջապէս յաջորդեցին քաղաքներէն և գիւղերէն հայ բնակիչներուն տեղահանումը և  բնաջնջումը: Մէկուկէս միլիոնէ աւելի նահատակ արեւմտեան Հայաստանի կորուստ մարդկային, հողային ու մշակութային իմաստներով: Այսօր ճիշդ է ,որ անցած են 102 տարիներ այդ անմարդկային ու հայասպան ոճիրէն, բայց մեր սրտերուն խոր ու ցաւոտ վէրքերը  կը շարունակեն արիւնիլ: Հարկ է սակայն միաժամանակ հաստատել որ մեր նախահայրերու սխրագործութիւնը Մուսա Լերան հերոսամարտով, նաեւ կու գայ ապացուցել, թէ հայ ազգը չի խոնարհիր թշնամիին, այլ խիզախօրէն կը դիմադրէ անոր:»

Ընկեր Անտոնեան կոչ ուղղեց  հայ երիտասարդները պահել մեր լեզուն, մեր գիւղերն ու պատիւը, անոնք պիտի պաշտպանեն ու վերջ դնեն բոլոր յոռի երեւոյթներուն:

Բացման խօսքին յաջորդեց Այնճարի Հայ Աւետարանական երկրորդական վարժարանի «Նայիրի» երգչախումբի ելոյթը` խմբավարութեամբ Նեկտար Փալազեանի, երգեցին «Մայր Հայրենիք» երգը: Ապա բեմ բարձրացան Աւետարանական դպրոցի նուագախումբը որոնք ներկայացուցին Արթուր Մեսչյանի «Աշխարհի ցաւով» երգը: Որմէ ետք Նազանի Ադամեան և Նարէ Փիլաւճեան ասմունքեցին Յովհաննէս Շիրազի «Ամենայն Սրտով» հատորը:

Օրուան բանախօս Դաւիթ Գազանճեան ըսաւ թէ: «19.րդ դարու վերջին տարիներուն հայ ժողովուրդը ապրեցաւ յեղափոխական զարթոնք: Այդ տարիներուն ծնունդ առին հայկական կուսակցութիւնները, որոնց հիմնական դերը եղաւ կազմաւորել և համախմբել ցանցօրէն գործող հայկական տարբեր ինքնապաշտպանական աշխատանքներ տանող խմբաւորումները: Զուգահեռ, Օսմանեան կայսրութիւնը արդէն իսկ սկսած էր իր հեռակայ ծրագրի իրականացման առաջին աշխատանքներուն: Երկրին մէջ արդէն արիւնահեղութիւնը սկսած էր:»

Գազանճեան շարունակեց ըսելով:«Օսմանեան կայսրութեան գերագոյն նպատակն էր կազմել բանթուրանական մեծ պետութիւն մը, զուրկ այլ ազգերէն և կրօններէն: Այս ծրագրի իրականացման գլխաւոր խոչընդոտը կը հանդիսանար հայ ժողովուրդը: Ժողովուրդ մը որ կառչած է իր հողին ու արմատներուն, ժաղովուրդ մը որ գիտէ ստեղծագործել, պայքարիլ և գոյատեւել: Պէտք էր տեղ մը սկսիլ, հայ ժողովուրդի միտքն ու հոգին զարգացնող մտաւորականութիւնը մէկ գիշերուայ մէջ վերացան: Սիամանթոն իր աչքերով տեսաւ և ապրեցաւ այն կարմիր լուրերը որ լսած էր բարեկամէն, անոր հոգեվարքի ջահը մարեցաւ, բայց անմար մնաց յոյսի ջահը: Դանիէլ Վարուժան ապրեցաւ սարսուռներ, լսեց հեթանոս երգեր, բայց չկրցաւ ունկենդրել հային երգը, ան նահատակուեցաւ իմանալով թէ ցեղին սիրտը պիտի չմեռնի: Իսկ Գրիգոր Զոհրապը պիտի չտեսներ այլեւս ծանօթ դէմքէր և ոչ ալ զրուցեր Եւրոպայի ուղեւորներու հետ: 100 տարի առաջ ուզեցին  տկարացնել և քարտէսէն ջնջել Հայստանը, սակայն այսօր ան աւելի ուժեղ է շնորհիւ իր աշխարհասփիւռ հայութեան, որոնք հասակ առին օտար ափերու մէջ և գիշեր ցերեկ կ'աշխատին հանուն հայ դատին, հանուն հայրենիքին և հայ ժողովուրդի արդար բոլոր իրավունքներու վերատիրացման:»

Գազանճեան իր խօսքը շարունակեց ըսելով թէ 100  տարի առաջ թուրքերը ուզեցին ճզմել, մարել և բնաչնչել Հայ ժողովուրդը, սակայն շյաջողեցան, Վարուժանի, Զոհրապի ու Մաշտոցի զաւակները ոտքի ելան պահնջատիրութեան հոգիով:

Ան իր խօսքը աւարտեց ըսելով: «Մինչեւ այն ժամանակ որ պահանջատէր երիտասարդներ ունի մեր աւգը, մեր դատը անմար կը մնայ և ջահը կը փոխանցուի սերունդէ սերունդ:»

Այնուհետեւ, ՀՅԴ «Յառաջ» պատանեկան միութեան պատանիները ներկայացուցին Հայ ազգի պահանջատիրութիւնը և պայքարը խորհրդանշող կենդանի պատկեր մը:

Որմէ ետք, Ազգային Յառաջ – Գ. Կիւլպենկեան երկրորդական վարժարանի աշակերտները ներկայացուցին պար մը:

Ապա տեղի ունեցաւ տեսաերիզի ցուցադրութիւն Այնճարի Հայ կաթողիկէ քոյրերու վարժարանի կողմէ:

Հսկումի պաշտօնական բաժինը աւարտեցաւ «Պիտի Գնանք Վաղ թէ Ուշ» երգով որ ներկայացուց ՀՅԴ ԼԵՄ-ի «Շ. Միսաքեան» մասնաճիւղի ընկեր, ընկեր Համբիկ Յովսէփեան:

Ներկաները սրահէն դուրս գալով ականատես եղան կրակով ներկայացուած հատուցման ժամուն:

Հսկումը շարունակուեցաւ քայլարշաւով: Հոծ բազմութիւնը առաջնորդութեամբ շեփորախումբին եւ ԼԵՄ-ական ու պատանի ջահակիրներուն ուղղուեցաւ դէպի Մուսա լերան յուշահամալիր, ուր ծաղկեպսակ զետեղուեցաւ ՀՅԴ ԼԵՄ-ի «Շ. Միսաքեան» մասնաճիւղին կողմէ:

Հսկումը աւարտեցաւ աղօթքով` գիւղի հոգեւոր հայրերուն կողմէ:

IMG6843
IMG6840
IMG6825
IMG6813
IMG6803
IMG6792
IMG6795
IMG6787
IMG6736
IMG6731
IMG6718
IMG6689
IMG6687
IMG6686
IMG6681
IMG6678
IMG6657
IMG6647
IMG6644
IMG6613
IMG6600
IMG6597
IMG6596
IMG6592
IMG6582
IMG6581
IMG6577
IMG6560
IMG6556
IMG6552
april-24

LOGO en