Լուրերու Արխիվ

Ainjari Badviragoutioun

Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ ԸՆԴՈՒՆԵՑ
ԱՅՆՃԱՐԻ ՀԱՅՈՒԹԻՒՆԸ ՆԵՐԿԱՅԱՑՆՈՂ ՊԱՏՈՒԻՐԱԿՈՒԹԻՒՆԸ ԱՆԹԻԼԻԱՍԻ ՄԷՋ

Հինգշաբթի 1 Դեկտեմբեր, 2016-ի առաւօտուն, Ն.Ս.Օ.Տ.Տ. Արամ Ա. Վեհափառ Հայրապետը Վեհարանի Դահլիճին մէջ ընդունեց այցելութիւնը Այնճարի հայութիւնը ներկայացնող պատուիրակութիւնը։

Շուրջ երեսուն հոգիներէ բաղկացած պատուիրակութեան մաս կը կազմէին երեք համայնքներու հոգեւոր պետերը, թաղականութեան ու հոգաբարձութեան ներկայացուցիչները, Հայ Յեղափոխական Դաշնակցութեան կոմիտէն ինչպէս նաեւ բարեսիրական ու համայնքային քոյր կազմակերպութիւններու ներկայացուցիչները։ Պատուիրակութիւնը եկած էր շնորհաւորելու Նորին Սրբութեան ընտրութեան եւ օծման 20-րդ տարեդարձը։

Պատուիրակութեան անունով խօսք առաւ Այնճարի Քաղաքապետ Տիար Վարդգէս Խօշեան։ Ան ողջունեց Վեհափառ Հայրապետին ընտրութեան ու օծման 20-րդ տարեդարձը, ընդգծելով վերջին երկու տասնամեակներուն Նորին Սրբութեան կատարած իրագործումները մեր եկեղեցւոյ ու ժողովուրդին հաւաքական կեանքի զանազան մարզերէն ներս, ինչպէս նաեւ միջ-եկեղեցական ու միջ-կրօնական յարաբերութեանց ծիրէն ներս։ Որպէս Մեծի Տանն Կիլիկիոյ Վեհափառ, Ձեր 20-ամեայ գահակալութիւնը յատկանշուեցաւ Ազգային, Շրջանային, Միջազգային, և Համաշխարհային անհատնում գործունէութեամբ: Դուք եղաք հոն ուր պատասխանատու և խիզախ որոշում պէտք էր, և ձեր ուղղամիտ կեցուածքներով բարեփոխումներու առանցքը հանդիսացաք: Եղաք աշխարհի մեծագոյն ամպիոններու վրայ. և ձեր վեհածածան բայց վսեմաշուք դիրքորոշումներով հայացուցիք կրօնքի և հաւատքի գաղափարները, որովհետեւ ամէն տեղ, և միշտ դուք առաջնորդուեցաք ձեր խղճով, կամքով և հաւատքով, հայկական հազարամեայ արժէքներու լիարժէք թարգմանն ու ջատագովը ըլլալու հանգամանքով: Եղաք պահանջատէր ու բոլոր բեմերէն բարձրաձայն ու վճռակամ, պաշտպանեցիք մեր ինքնութիւնն ու իրաւունքները: Ձեր արարչական կարողութիւնները բարձրացուցին ձեզ, բայց դուք մնայուն կերպով բարձր պահեցիք հայ ընտանիքը, հայկական դպրոցն ու հայ եկեղեցին: Ուրախ և հպարտ եմ, որ այս բարեբաստիկ միջոցառմանը առիթով ինծի վիճակուեցաւ Այնճարի հայութեան անունով երկիւղածութեամբ խոնարհիմ ձեր դիմաց ու սրբութիւններու օրհնութիւնը խաչակնքող ձեր աջը համբուրեմ:

Վեհափառ Հայրապետը իր գնահատանքը յայտնելէ ետք եղած բարեմաղթութիւններուն, շեշտեց Այնճարի իւրայատուկ կարեւորութիւնը Լիբանանի հայութեան կեանքէն ներս։ Նորին Սրբութիւնը Այնճարը նկատեց՝ «Փոքր Հայաստան» ուր մեր հոգեւոր, ազգային ու մշակութային արժէքներն ու աւանդութիւնները միշտ մնացած են անվթար ու կենսունակ։ Նորին Սրբութիւնը շեշտեց Այնճարի հայկական դիմագիծը առողջ պահելու հրամայականը։

Ainjari-Badviragoutioun
15252465101549230381437147843688665699155338o
15252524101549230381187147303720755114237159o
15259400101549230384287146825098186002050418o

LOGO en