Տարեցներու Ձեռնարկ
Այնճարի տարեցները Ս. Զատկուան ճաշկերոյթը վայելեցին ճաշարան «Արեւ»-ի տնօրէնութեան հրաւէրով, Հինգշաբթի, 20 Ապրիլ 2017-ի կէսօրին:
Տէր Միւռոն քահանայ Աւետիսեանի օրհնութեան աղօթքով և Այնճարի հոգեւոր հայրերու ներկայութեամբ, ԼՕԽ-ի «Աղթամար» մասնաճիւղին կողմէ ձեռնարկը բացուած յայտարարուեցաւ: Ապա ընկերային յանձնախումբի ատենապետ՝ ընկհ. Ծաղիկ Հերկելեան, շնորհաւորեց ներկաներուն Զատիկը և բարի գալուստի, բարի վայելումի և առողջութեան մաղթանքներէն ետք, խօսքը տուաւ օրուան հանդիսավարներուն՝ ընկերուհիներ Համեստ Ճամպազեանին և Սալբի Հանտեանին:
Անոնք զուարճացուցին ներկաները իրենց հաճոյակատարումներով և Մուսա Տաղեան առօրեան բնորոշող առածներով, երգերով և հանելուկներով:
Մէջ ընդ մէջ, յայտագիրը ճոխացուցին ներկայները, իրենց երգերով, ասմունքներով, պարերով:
Սրտի խօսք փոխանցեցին, Տէր Արսէն քահանայ Քէշիշեան, առաքինազարդ քոյր Թէօպիստէ Պետրոսեան և Շրջանային Վարչութեան ներկայացուցիչ՝ ընկհ. Ցօղիկ Հաւաթեան:
Ապա տեղի ունեցաւ հաւկթախաղ:
Ձեռնարկի աւարտին, վարչութիւնը յուշանուէրով մը պատուեց օրուան բարերար ընտանիքին մայրը՝ ընկհ. Վարդուհի Զէյթլեանը:
Ապրիլեան Մտորումներ. «Ես Զաւա՛կն Եմ Հայաստանի»…
ՍԱԼԲԻ ՔԻՒՐՔՃԵԱՆ-ԹԱՇՃԵԱՆ
Այո՛. զաւակն եմ Հայաստանի եւ հպարտութեամբ կը բարձրաձայնեմ այս տողը, ո՛չ միայն այն պատճառով, որ Հայաստանը իմ հայրենիքս է եւ հայերէնը իմ մայրենի լեզուս, այլեւ զաւակն եմ այն հողատարածքին, զոր թշնամին դարէ մը ի վեր կը պարծենայ իր գերութեան տակ պահելով կը պարծենայ, մինչ անիկա պապենական մեր երկրէն բաժին մըն է:
Թուրքին եաթաղանը սպառնաց հայուն միայն ա՛յն ժամանակ, երբ այս վերջինէն խլուած էր իր զէնքը, որովհետեւ թշնամին լաւապէս կը ճանչնայ հայուն յարատեւ պայքարը, որ արեան գնով պատրաստ է ոռոգելու իր բերրի դաշտերը, սերմանելու հերկուած ակօսները:
Թշնամին մոռցաւ սակայն «ղօղանջող զանգերը», որոնց ձայնը լսելի է միա՛յն հայուն. ի զուր փնտռեց, որպէսզի լռեցնէ ու ոչնչացնէ արդարութեան ամէն բեկոր, սակայն չգտաւ. մեր սրտի բաբախումին պէս այդ զանգերը շարունակեցին ու կը շարունակեն հնչել անդադար, անկոտրում հաւատքով ու նուիրագործութեամբ:
Եւ ապրեցա՛նք. գոյատեւեցի՛նք. թէկուզ այլ երկինքի տակ, կորսուած հողի կարօտով. եւ ամիսը` իր բառարանային իմաստով, շարունակեց ըլլալ ճշմարիտ, կեանք նուիրեց մնացորդացին, եւ երթը շարունակուեցաւ…
23 ապրիլ 2017, Այնճար…
Լոյսերը կը մարին, եւ վարագոյրը կը բացուի:
«Սուրբ երկիրը» կը հնչէ. պատկերը մարմին կը ստանայ, եւ նահատակութեան բագինին առաջնորդող պարը թափ կ՛առնէ: Կոտորած, մահ ու սարսափ, անժպիտ նայուածք, սակայն` խիզախ ու հպարտ շարժումներով կը շորորայ նազանի գեղուհին, որ սեւազգեստ լռութեան կը յանձնէ իր մենութիւնը, իր զայրոյթն ու պոռթկումը անարդարութեան ստուերներուն մէջ թաղած` վերապրումի զարթօնքը կը սփռէ: Ազատութի՜ւն, դէպի երկինք ու գերուած հողերը վերականգնելու աստուածային ամպրոպ, թռչունի պէս սաւառնելու երկրէ-երկիր` վերջապէս թառելու արդարութեան խաղաղ կտուրին, ուրկէ ծնունդ կ՛առնէ յաւերժութեան ջահը, յաղթանակի՛ ջահը` իր խայտացող շողերով շլացնելու անգութ թշնամին: Աւելի՛ն. Արարատի կատարին եռագոյն դրօշ կը պանծայ, մինչ հայրենաբաղձ կարօտի յուզումով հանդիսատեսը երկա՜ր ժամանակ կը ծափահարէ:
Ապրի՛ք, սիրելի՛ աշակերտներ, Ազգային Յառաջի հնոցէն ստացած ձեր դաստիարակութեամբ` ձեր ներկայացումը սովորական չհնչեց, այլ` պարային ձեր ելոյթով դուք թարգմանը հանդիսացաք արդար պահանջատիրութեան` բռնագրաւուած հողերուն ու մէկուկէս միլիոն նահատակներուն, որոնց ոսկորները իրենց վերջնական հանգիստը պիտի գտնեն ազատ, անկախ ու միացեալ Հայաստանի հողին վրայ…
25/4/2017
Այնճար
Զեկուցական Երեկոյ
կազմակերպութեամբ Համազգայինի Այնճարի «Պարոյր Սեւակ» Մասնաճիւղի Մշակութային յանձնախումբին, Ուրբաթ 28 Ապրիլ 2017-ին երեկոյեան ժամը 7:30-ին, «Ս. Զէյթլեան» կեդրոնի «Մովսէս Տէր-Գալուստեան» սրահին մէջ տեղի ունեցաւ զեկուցական երեկոյ մը, որոնց ընթացքին զեկուցեց «Մեսեչուսեց ինսթիթիութ օֆ թեքնոլոճի»-ի («Էմ. Այ. Թի.») Մըք Միլըն-Սթիուըրթի պատմութեան օժանդակ դասախօս դոկտ. Լերնա Էքմեքճիօղլու:
Համազգայինի Այնճարի «Պարոյր Սեւակ» Մասնաճիւղի Մշակութային յանձնախումբին անունով բացման խօսքը կատարեց Յակոբ Այնթապլեան: Ան հակիրճ ձեւով ներկայացուց դասախօսը, անոր գործերը և ուսումնասիրութիւնները:
Յետ բացման խօսքին, Սեւան Սարգիսեան ներկայացուց արտասանութիւն մը:
Դոկտ. Էքմեքճիօղլու իր կարգին շնորհակալութիւն յայտնեց ներկաներուն եւ Մշակութային յանձնախումբին զինք հրաւիրելու նման ձեռնարկ մը կազմակերպելու առիթով: Դոկտ. Էքմեքճիօղլու անդրադարձաւ Ցեղասպանութենէն անմիջապէս ետք տիրող կացութեան` հաստատելով հայ կնոջ կարեւորութիւնը հայ ժողովուրդի պահպանումին եւ ապաքինման մէջ: Ան նկատել տուաւ, որ Հայոց ցեղասպանութենէն ճողոպրած հայերու որոշ թիւ մը մնացած էր Պոլիս` նկատի ունենալով, որ Համաշխարհային Ա. պատերազմէն ետք դաշնակից ուժերը Օսմանեան կայսրութեան սահմաններուն տիրացած էին: Դոկտ. Էքմեքճիօղլու նշեց, որ Ա. ժամանակաշրջանին հայը կորսնցուց ամէն ինչ որ ունէր, իսկ փոխանցման շրջանին` վրայ հասաւ այլ սարսափ մը, որ մարմնաւորուեցաւ դաշնակից ուժերուն Թուրքիայէն հեռացումով, որուն պատճառով տասնեակ հազարաւոր հայեր փախուստ տուին Պոլիսէն:
Բ. ժամանակաշրջանին հայերը արդէն իսկ վերածուած էին փոքրամասնութեան, անոնք զրկուած էին քաղաքացիի լիիրաւ իրաւունքներէն եւ կ՛ապրէին իբրեւ երկրորդ կարգի քաղաքացիներ: Ան անդրադարձաւ Պոլսոյ մէջ հրատարակուող շարք մը հայկական պարբերաթերթերու եւ հրատարակութիւններու, շեշտը դնելով պոլսահայութեան մէջ կիներու իրաւունքներու հիմնական պաշտպան Հայկանուշ Մարքի հրատարակած «Հայ Կին» հրատարակութեան վրայ` ցաւով յայտնելով, որ 1933-ին վերջ գտած էր անոր հրատարակութիւնը: Էքմեքճիօղլու շեշտեց, որ կիներու իրաւունքներու պաշտպանութեան առումով պոլսահայութիւնը իր իւրայատուկ պատմութիւնը ունի` յատկապէս պոլսահայութեան հայկական ինքնութիւնը պահպանելու իմաստով:
Դասախօսութեան աւարտին դոկտ. Էքմեքճիօղլու և Ալին Ուզանեան, պոլսահայ թղթակից, պատասխանեցին ներկաներուն հարցումներու տարափին:
Ձեռնարկը աւարտեցաւ սրինքի մեղմիկ նուագով որ նուագեց Հասմիկ Այնթապլեան:
Միջերկրական Պտուղի Ճանճին Դէմ Պայքարելու Գործնական Քայլ
Շաբաթ 29 Ապրիլ 2017-ին, առաւօտեան ժամը 10:00-էն սկսեալ Այնճարի Քաղաքաետութեան Կենսոլորտի Յանձնախումբը սկսաւ իր գործնական քայլին պայքարելու համար Միջերկրական Պտուղի Ճանճին դէմ:
30-է աւելի հողագործներ և գիւղացիներ ներկայացան քաղաքապետարան, ունենալով իրենց հետ 1000-է աւելի բլաստիկէ շիշեր: Յանձնախումբի անդամները զետեղեցին դեղերը այդ շիշերուն մէջ:
Այս աշխատանքը պիտի կատարուի նաեւ Շաբաթ 6 Մայիս 2017-ին, առաւօտեան ժամը 10:00-1:00 նոյն վայրին մէջ: Կը խնդրենք մեր գիւղացիներէն անպայման ներկայանան որպէսզի իրենց շիշերուն մէջ զետեղուի դեղը գիտակցելով որ այս աշխատանքին յաջողութիւնը փրկելու համար գիւղին բերքերը կը պահանջէ համագիւղական բարձր գիտակցութիւն և աշախատանք:
Սայտայի Մարաթոն. «Յաղթանակս Կը Նուիրեմ Հայոց Ցեղասպանութեան Զոհերուն» Ըսաւ Լեւոն Թաշճեան
Կիրակի, 23 ապրիլ 2017-ին, Սայտայի քաղաքապետութիւնը առաջին անգամ ըլլալով կազմակերպած էր մարաթոնի մրցում մը` 42.195 քմ վազքի: Այս մարաթոնը կը վայելէր երեսփոխան Պահիա Հարիրիի հովանաւորութիւնը: Մարաթոնին նշանաբանն էր «Վազենք խաղաղութեան ու զարգացման համար»:
42.195 քմ վազքի մրցումին կը մասնակցէին 15 հազարէն աւելի երկսեռ մարզիկներ` օտար երկիրներէ եւ Լիբանանէն:
Մարզիկները վազքը սկսան ներկայութեամբ քաղաքական եւ միութենական անձնաւորութիւններու, ինչպէս զբօսաշրջութեան նախարար Աւետիս Կիտանեան, երեսփոխան Պահիա Հարիրի, Ֆուատ Սինիորա, եւ ուրիշներ:
42.195 քմ վազքը սկսաւ լիբանանեան քայլերգով, առաւօտեան ժամը 7:00-ին, Սայտայի քաղաքապետութեան ֆութպոլի դաշտի դիմացէն: Մարզիկները խանդավառօրէն շրջեցան ամբողջ Սայտան, իսկ մրցումը աւարտեցաւ սկսած վայրին մէջ:
Լեւոն Թաշճեան մասնակցեցաւ այս մարաթոնին` իր մտքին ունենալով Հայոց ցեղասպանութեան զոհերուն յիշատակը: Ան 42.195 քմ վազքը աւարտեց 4 ժամ 55 վայրկեան ժամանակէն եւ իր տարիքային խմբաւորման մէջ գրաւեց առաջին դիրքը: Լեւոն Թաշճեան իր տիտղոսը ստացաւ ձեռամբ երեսփոխան Պահիա Հարիրիի: Լեւոն Թաշճեան յայտարարեց, որ իր տիտղոսն ու յաղթանակը կը նուիրէ Հայոց ցեղասպանութեան զոհերու յիշատակին:
ԱԶԴԱԿ Օրաթերթ
Այս առիթով, Այնճարի հայութիւնը, գլխաւորութեամբ՝ «Կարմիր Լեռ» կոմիտէին, կու գայ շնորհաւորելու Ընկեր Լեւոն Թաշճեանը:
