Դասախօսութիւն
Լ.Օ.Խ-ի «Աղթամար» մասնաճիւղի դարմանատան յանձնախումբը, իր 2017 տարեշրջանի ծրագրին մէջ որոշեց դասախօսութեան շարք մը: Առաջինը տեղի ունեցաւ Ուրբաթ 13 Յունուար 2017-ին, «Ֆիլհաննէսեան» կեդրոնէն ներս: Հրաւիրուած էր գիւղիս փորձառու հիւանդապահուհի Վիգի Հերկելեանը՝ նիւթ ունենալով «Յետ Վիրաբուժական Խնամք»:
Ձեռնարկին բացման խօսքը կատարեց Ընկհ. Սոնա Տուզմանեան, որ կենսագրութեան կարճ տեղեկութենէն ետք հրաւիրեց Օրդ. Վիգին:
Դասախօսուհին հանգրուան առ հանգրուան բացատրեց հիւանդին հոգեկան և Ֆիզիքական պատրաստուածութիւնը նախ քան վիրաբուժութիւն:
Ինչպէս նաեւ շեշտեց հիւանդին հարազատներուն հասկացողութիւնը հանդէպ պարագայի վիճակին:
Մեծ թիւով ներկաները հաղորդական էին դասախօսուհիին հետ: Հետաքրքրական էր հիւանդը անկողինի մէջ խնամելու գործնական ձեւերը:
Հիւրասիրութեան ընթացքին եղան նաեւ հարցումներ որոնց տրուեցաւ յստակ բացատրութիւն:
Վարչութիւնը, յանձնախումբի ընկերուհիներն ու ներկաները բարեմաղթանքներով բաժնուեցան սրահէն:
