Սուրբ Զատկուայ Տօնը Այնճարի Մէջ
Կիրակի՝ 16 Ապրիլ 2017-ին Այնճարի երեք համայնքներու եկեղեցիները նշեցին Յիսուս Քրիստոսի Հրաշափառ Յարութեան տօնը, Սուրբ Զատիկը:
Այնճարի Հայ Առաքելական «Ս. Պօղոս» եկեղեցւոյ մէջ պատարագեց՝ Գերշ. Տէր Արսէն Աւագ Քհնյ. Քէշիշեանը: Ներկայ էին մեծ թիւով հաւատացեալներ:
Յետ Ս. պատարագին, ներկաները ուղղուեցան «Գ. Կիւլպէնկեան» սրահ առաջնորդութեամբ՝ դպրաց դասին և երեք Հոգեւոր Հայրերուն ուր ունեցան հաւկթամարտ:
Այնճարի Հայ Կաթողիկէ «Ս.Աստուածածնայ Տիրամայր» եկեղեցւոյ մէջ նաեւ կատարուեցաւ Ս. Զատկուայ արարողութիւն գլխաւորութեամբ՝ Հայր Մեսրոպ Վրդ. Թօփալեանի:
Այնճարի Հայ Աւետարանական Եկեղեցւոյ մէջ տեղի ունեցաւ պաշտամունք իսկ օրուայ պատգամը փոխանցեց, եկեղեցւոյ հովիւ՝ Պատ. Յակոբ Ագպաշարեան: Պաշտամունքեն ետք «Ջանից» սրահին մէջ նաեւ ունեցան հաւկթամարտ:
Քրիստոս Յարեաւ Ի Մեռելոց: Օրհնեալ է Յարութիւնն Քրիստոսի:
