Պասիթէն Թրիփոլի, Ռայաք Եւ Այնճար
Պասիթէն Թրիփոլի, Ռայաք Եւ Այնճար
Այն օրերուն, երբ մուսալեռցիք տաժանելի օրեր կ՛անցընէին Պասիթի մէջ, Ֆրանսական հոգատար իշխաննութիւնները աշխատանք կը տանէին ապահովելու համար նոր բնակավայր մը Մուսա Լերան ժողովուրդին համար: Մուսալեռցի ղեկավար եւ Սուրիական Խորհրդարանի երեսփոխան (1927-1937) Մովսէս Տէր Գալուստեան մեծ դեր կ՛ունենայ նոր կայքի ապահովութեան մէջ եւ փաստօրէն կը դառնայ նոր կայքի (Մուսալեռ-Այնճարի) հիմնադիրը:
Այս աշխատանքը կ՛արդիւնաւորուի եւ կ՛ապահովուի Այնճար անունով ընդարձակ կիսանապատային դաշտը , Լիբանանի Պէքաայի դաշտին արեւելեան կողմը , Սուրիական սահմանին մօտ , լիբանանեան արեւելեան լեռնաշղթայի ստորոտին:
Երբ ամէն կարգադրութիւն կ՛աւարտի , մուսալեռցիք նաւերով նախ կը փոխադրուին Թրիփոլի , ուրկէ շոգեկառքով ՝ Ռայաք եւ վերջապէս ապրանքատար ինքնաշարժներով ՝Այնճար 4-14 Սեպտեմբեր 1939 ին: Այսպիսով կը սկսի Այնճարի նոր Պատմութիւնը:
