Սուրբ Ծննդեան և Ամանորի Ճաշկերոյթ Պարահանդէս
Հովանաւորութեամբ՝ Գերպ. Հ. Գէորգ Եպս. Ասատուրեանի, Նախագահութեամբ՝ Գրիգոր և Քրիսթին Ճապուրեան բարերար ամոլին, Կազմակերպութեամբ՝ «Սուրբ Վարդարանի Տիրամայր» Հ. Կ. Ժողովրդապետութեան, Կիրակի 25 Դեկտեմբեր 2016-ին, երեկոյեան ժամը 8:00-էն սկսեալ, Ճաշարան «Արեւ»ի մէջ տեղի ունեցաւ Սուրբ Ծննդեան և Ամանորի Ճաշկերոյթ Պարահանդէսը:
Բացման խօսքը փոխանցեց Տիկնանց միութեան ատենապետուհի՝ Տիկ. Մարօ Անտոնեանը: Ան ողջունեց գիւղիս հոգեւոր հայրերը, Տէր և Տիկին Գրիգոր և Քրիսթին Ճապուրեանը, Տէր և Տիկին քաղաքապետ Վարդգէս Խօշեանը, միութեանց ներկայացուցիչները և բոլոր ներկաները: Ան ըսաւ,- «Այնճարի հայ կաթողիկէ համայնքին Սուրբ Ծնունդի և Ամանորի այս տարեկան Ճաշկերոյթ-Պարահանդէսը ա՜լ աւանդական դարձած ըլլալէն աւելի՝ եղաւ և մնաց առիթն ու ժամադրութիւնը բոլոր անոնց, որոնք կուզեն ուրախանալ տօնական և ընտանեկան մթնոլորտին մէջ: Այս ձեռնարկին մեր կազմակերպութեամբ ու ձեր ներկայութեամբ՝ բոլորս կուզենք ուրախանալ: Եւ մեր այս ուրախութեան մէջ, կ’ուզենք շնորհաւորել Ս. Ծնունդը և Նոր Տարին: Բոլորս աղօթենք Նորածին Արքային և Աստուածային Մանուկին, որ 2017-ը դառնայ խաղաղութեան, արդարութեան և բարօրութեան տարին: Վերջապէս գերապատիւ ժողովրդապետին սրտով, Ծխական Խորհուրդին, Եկեղեցասէր Տիկնանց-ին, «Հէպոյեան» երգչախումբին, և Հ.Կ.Ե.Մ-ի անունով կ’ողջունեմ ձեր ներկայութիւնը, ինչպէս նաեւ ձեզի կը մաղթեմ շատ ուրախ ժամանց:
Ապա գիւղիս ժողովրդապետ՝ Հայր Մեսրոպ Վրդ. Թօփալեան, բացումը կատարեց Տերունական Աղօթքով:
Օրուան հանդիսավարներն էին Պրն. Ժանօ Փամպուքեանն ու Օրդ. Մեղրի Քէնտիրճեանը:
Պրն. Ժանօ Փամպուքեան, շնորհաւորեց բոլոր ներկաներուն Սուրբ Ծնունդը, մաղթելով անոնց խաղաղութեամբ և ուրախութեամբ լի տարի մը: Ապա, Օրդ. Մեղրի Քէնտիրճեան բարի գալուստի խօսք ուղղեց բոլոր կաթողիկէ համայնքի զաւակներուն Ս. Ծննդեան Տօնին առթիւ: Յատուկ շնորհակալութեան խօսք յայտնեց կաթողիկէ եկեղեցւոյ «Սուրբ Վարդարանի Տիրամօր» տիկնանց միութեան, և բոլոր անոնց որոնք իրենց աջակցութիւնը բերած են ճաշկերոյթի յաջողութեան: Ինչպէս նաեւ շնորհակալութիւն յայտնեց Պրն. Գրիգոր Ճապուրեանի, որուն շնորհիւ նորոգուեցաւ և փայլեցաւ «Սուրբ Վարդարանի Տիրամօր» եկեղեցին: Այսպիսով Պրն. Ճապուրեանի ուխտն էր հաստատ պահել նոր և գալիք սերունդներուն հաւատքն ու եկեղեցւոյ սէրը: Արդէն իսկ 2016-ը հասած է իր աւարտին, և բոլորս ուրախութեամբ պիտի դիմաւորենք Նոր Տարին: Իմ մաղթանքս այս ուրախ առիթով պիտի ըլլայ՝ հանգիստ դժուար օրերուն, ժպիտ՝ տխուր պահերուն, մութ ամպերը ճեղքող գունագեղ ծիածան, ձեր շրթունքները համբուրող մշտական ժպիտ, սրտեր ջերմացնող տաքուկ արեւ, ձեր էութիւնը վսեմացնող հարազատ ընկերներ, կասկածներ չախչախող վստահութիւն, դուք ձեզ ճանչնալու քաջութիւն և ձեր կեանքը իմաստաւորող սէր:
Օրուան մթնոլորտը ճոխացուց Սիրուած Երգիչ՝ Արարատ Ահարոնեան և իր նուագախումբը, մասնակցութեամբ՝ Յակոբ և Շանթ Փիլաւճեան եղբայրներուն:
Ճոխ երգերով, և ուրախ մթնոլորտով ընկերակցեցան պարեր, որոնք տեւեցին մինչեւ ուշ գիշեր:
