Երկուշաբթի 6 Յունուար 2020ին, Այնճարի Հայ Առաքելական համայնքը նշեց Սուրբ Ծննդեան տօնը, «Սուրբ Պօղոս» եկեղեցւոյ մէջ:
Արդարեւ տեղի ունեցաւ Սուրբ եւ Անմահ Պատարագ, որուն ընթացքին Տէր Միւռոն քհնյ. Աւետիսեան քարոզեց ներկաներուն ծնունդի խորհուրդին մասին, ու մաղթեց բոլորին խաղաղութիւն ու բարեբեր տարի մը, որմէ ետք տեղի ունեցաւ ջրօրհնէք։ Աւարտին ամբողջ հաւատացեալ ժողովուրդը եկեղեցական թափօրով ուղղուեցան դէպի «Գ. Կիւլպէնկեան» սրահ, ուր տեղի ունեցաւ ծնունդի երգեցողութիւն եւ հիւրասիրութիւն։
Այնճարի Հայ Աւետարանական համայնքն ալ նշեց Ս. Ծննդեան տօնը։ Եկեղեցւոյ մէջ Ներկայ էր հաւատացեալ ժողովուրդը , մասնակից դառնալու Սուրբ Ծննդեան պաշտամունքին որ կատարեց Պատուելի Յակոբ Ագպաշարեանը եւ բոլորին ողջունեց Սուրբ Բրկիչին գալուստով մաղթելով բոլորին յաջողութիւն կեանքի մէջ, խաղաղութիւն եւ արեւշատութիւն. Պաշտամունքէն ետք եկեղեցւոյ «Ջանից» սրահին մէջ, ներկաները տօնական հիւրասիրութեամբ շնորհաւորեցին Քրիստոսի Ծնունդն ու իրենց բարեմաղթութիւնները փոխանցեցին իրարու:
Քրիստոս Ծնաւ եւ Յայտնեցաւ, Ձեզի Մեզի Մեծ Աւետիս։
