Կիրակի 17 Ապրիլ 2022-ին, երեկոյեան ժամը 5:00-ին, կազմակերպութեամբ` ՀՅԴ «Կարմիր Լեռ» կոմիտէի դաստիարակչական եւ համացանցի յանձնախումբին, ըստ աւանդութեան Ս. Յարութեան տօնին առիթով «Ս. Զէյթլեան» կեդրոնին մէջ տեղի ունեցաւ մտերմիկ հաւաք մը։
Ձեռնարկին ներկայ էին Պէքաայի հոգեւոր տեսուչ հոգեշնորհ Տ. Անանիա Ծ. վրդ. Գուճանեանը, գիւղի 3 համայնքներու հոգեւոր հայրերը, ՀՅԴ «Կարմիր Լեռ» կոմիտէի ընկերները, քաղաքապետն ու քաղաքապետական խորհուրդի անդամներ եւ գիւղիս մէջ գործող միութեանց վարչութիւնները։
հերթաբար խօսք առին եւ իրենց բարեմաղթութիւները փոխանցեցին Գերշ. Տ. Անանիա Ծ. վրդ Գուճանեան, գերշ. Մեսրոպ վրդ. Թոփալեան, պատուելի Յակոբ Աքպաշարեան , Այնճարի քաղաքապետ` ընկեր Վարդգէս Խօշեան, ՀՅԴ «Կարմիր Լեռ» կոմիտէի անդամ` ընկեր Եսայի Հաւաթեան եւ ՀՅԴ «Կարմիր Լեռ» կոմիտէի դաստիարակչական եւ համացանցի յանձնախումբի նախագահ` ընկեր Խաժակ Այնթապլեան։
Հաւաքին աշուղական 2 երգերով հանդէս եկաւ պրն. Գէորգ Պէպէճեան խանդավառելով ներկաները, որմէ ետք հոգեւոր հայրերն ու ՀՅԴ «Կարմիր Լեռ» կոմիտէի ներկայացուցիչը եւ Այնճարի քաղաքապետը միասնաբար հատեցին կարկանդակը։
Հաւաքի աւարտին ներկայ գտնուեցաւ նաեւ Լիբանանի ճարտարարուեստի նախարար եւ Պէքաայի շրջանի ՀՅԴ երեսփոխանական թեկնածու` պրն.Ճորճ Փուչիկեան, որ ան եւս իր կարգին բոլոր ներկաները շնորհաւորեց Ս. Յարութեան տօնին առիթով։
Աւարտին տեղի ունեցաւ հիւրասիրութիւն։
Քրիստոս Յարեաւ Ի Մեռելոց Օրհնեալ է Յարութիւնն Քրիստոսի։
