Հովանաւորութեամբ եւ ներկայութեամբ՝ Լիբանանի մշակոյթի նախարար դատախազ Մուհամմատ Մուրդատայի, երեքշաբթի 14 Յունիս 2022-ին, բացումը կատարուեցաւ Այնճարի բերդի գլխաւոր մուտքին,
Ներկայութեամբ՝ Լիբանանի ճարտարարուեստի նախարար Ճորճ Պուչիկեանին, ՀՅԴ «Կարմիր Լեռ» կոմիտէին, Այնճարի քաղաքապետին, քաղաքապետական խորհուրդի անդամներուն, միութեանց ներկայացուցիչներուն եւ մեծ թիւով հայրենակիցներու:
Գլխաւոր մուտքի յուշատախտակի բացման արարողութենէն եւ ՀՄԸՄ Այնճարի մասնաճիւղի փողերախումբի Լիբանանի քայլերգի նուագէն ետք խօսք առաւ Այնճարի քաղաքապետ՝ ընկեր Վարդգէս Խօշեան, ուր ըսաւ «այս առիթը երազանքի իրականացում է որուն համար մենք միշտ աշխատած ենք եւ մշակոյթի նախարարին ջանքերուն շնորհիւ է հնագոյն գլխաւոր մուտքի օգտագործումը: Օմայյատ Այնճարի քաղաքը վերակառուցուած է»: ընկեր քաղաքապետը շնորհակալութիւն յայտնեց նաեւ բոլոր անոնց որոնք ներդրում ունեցան այս ծրագիրի իրականացման գործին:
Ապա իր սրտի խօսքը փոխանցեց Լիբանանի մշակոյթի նախարար դատախազ՝ Մուհամմատ Մուրդատան:Ան շեշտելով ըսաւ« չնայած այն բոլոր դժուարութիւններուն որ Լիբանան կը դիմագրաւէ, մեր երկրի մշակոյթը կը մնայ ամենահարուստը, որովհետեւ մեր մշակութային եւ հնագիտական ժառանգութիւնը այլ երկրի մէջ չկայ»: Իր խօսքը շարունակելով նախարարը շեշտեց որ Լիբանանի պատմութեան մէջ հայերը արաբներէն աւելի աշխատանք տարած են:
Այնուհետեւ ճարտարարուեստի նախարար՝ Ճորճ Պուչիկեան իր երախտագիտական խօսքը փոխանցեց մշակոյթի նախարարին իր խիզախ որոշումին համար եւ յատուկ շնորհակալութիւն յայտնեց Այնճարի ժողովուրդին բարեացակամութեան եւ միասնակամութեան համար:
Կազմակերպութեամբ ՀՅԴ «Կարմիր Լեռ» կոմիտէի դաստիարակչական յանձնախումբին, շաբաթ 11 Յունիս 2022-ին, երեկոյեան ժամը 8:00-ին ճաշարան «Արեւ»ի մէջ տեղի ունեցաւ «Լիռէոն Խայր» ֆիլմի անդրանիկ ցուցադրութիւնը, ներկայութեամբ հոծ բազմութեամբ։
Ձեռնարկին բարի գալուստի խօսքը փոխանցեց ՀՅԴ «Կարմիր Լեռ» կոմիտէի դաստիարակչական յանձնախումբի անդամ` ընկերուհի Բալիկ Գաբրիէլեան, ուր ան բոլորին անունով շնորհակալութիւն յայտնեց ընկերուհի Թամար Շահինեանին որ իր անխոնջ, երկարատեւ, բծախնդիր ու հետեւողական աշխատանքի արդիւնքն է այս ֆիլմը, ապա հաստատեց «պատմատեղեկագրական այս երիզը որ կարելի է նկատել արխիւ, վեր կ'առնէ Մուսա լերան հերոսամարտէն Այնճարի հիմնադրութեան 80 ամեակի ժամանակահատուածի գլխաւոր հանգրուանները»։ Բացման խօսքին յաջորդեց ֆիլմի ցուցադրութիւնը։ Ապա, ՀՅԴ «Կարմիր Լեռ» կոմիտէի ներկայացուցիչ`ընկեր Յարութ Զէյթլեան եւ տէր Աշոտ քհնյ. Գարագաշեան, յուշանուէրով մը պատուեցին ընկերուհի Թամար Շահինեանը։
Աւարտին ընկերուհի Թամար Շահինեան փոխանցեց սրտին խօսքը։ Ան նախ շնորհակալութիւն յայտնեց բոլոր անոնց որոնք սատար հանդիսացան ֆիլմի յաջողութեան, ապա ըսաւ «Կ՚ըսեն թէ ամէն չարիքի ետին բարիք մը կայ, եւ ես մեծ հաւատացողն եմ այս խօսքին։ Մանկութենէնս ետք, Իմ առաջին այցելութիւնս Այնճար տեղի ունեցաւ 2018 թուականին, երբ իմ փոքրիկ լուսանկարչական սարքովս փորձեցի առաւելագոյն նիւթեր ապահովել «հայ հորիզոն»ի յայտագրիս համար։ Սակայն տարի մը ետք Այնճարի հիմնադրութեան 80 ամեակի եւ Մուսա լերան հերոսամարտի 104 ամեակին առիթով դարձեալ վերադարձայ Այնճար եւ բոլոր ձեռնարկները նկարահանեցի, եւ որոշեցի պատրաստել վավերագրական այս ֆիլմը»։
