Մահազդ
Կիրակի 17 Դեկտեմբեր, 2017-ին մահացաւՎարդգէս Գժտըրեան (ծնեալ 1933)
Յուղարկաւորութեան արարողութիւնը պիտի կատարուի Երկուշաբթի 18 Դեկտեմբեր, 2017-ին կէսօրէ ետք ժամը 2-ին, Այնճարի Ս. Վարդարանի Տիրամօր եկեղեցւոյ մէջ ուրկէ հանգուցեալին մարմինը պիտի փոխադրուի Այնճարի գերեզմանատունը։
Մեր խորին ցաւակցութիւնները կը յայտնենք հանգուցեալին ընտանեկան պարագաներուն եւ հարազատներուն։
Հինգշաբթի 14 Դեկտեմբեր, 2017-ին, մահացաւ Մարի Տէօքմէճեան Ինճէեան(Ծնեալ 1941):
Յուղարկաւորութեան արարողութիւնը կատարուեցաւ Հինգշաբթի 14 Դեկտեմբեր, 2017-ին կէսօրէ ետք ժամը 1ին, Նոր Մարաշի Սրբոց Քառասնից Մանկանց Եկեղեցւոյ մէջ, ուրկէ հանգուցեալին մարմինը փոխադրուեցաւ Այնճարի գերեզմանատունը:
Մեր խորին ցաւակցութիւնները կը յայտնենք հանգուցեալին ընտանեկան պարագաներուն և հարազատներուն:
Կազմակերպութեամբ Սուրբ Պօղոս եկեղեցւոյ Տիկնանց Յանձնախումբին, Ուրբաթ 8 Դեկտեմբեր, 2017-ին առաւօտեան ժամը 10-ին, Այնճարի «Գ. Կիւլպէնքեան» սրահէն ներս տեղի ունեցաւ Ամանորի առթիւ նախաճաշ:
Բարի գալուստի խօսք արտասանեց Տիկ. Վարդուկ Գապագեան եւ թամատան էր Տիկ. Նարէ Քէօշկէրեան:
Ներկաները ուրախ մթնոլորտով պարեցին Այնճարի շուրջ պարը, եւ բարձր տրամադրութիւններով ու նուէրներով մեկնեցան տուն:
Կազմակերպութեամբ Այնճարի քաղաքապետական խորհուրդին եւ նախագահութեամբ Պեքաայի նահանգապետ Անթուան Սուլէյմանի, Շաբաթ 9 Դեկտեմբեր, 2017-ին, երեկոյեան ժամը 6-ին լուսաւորուեցաւ Այնճարի հրապարակին վրայ զետեղուած տօնածառը:
Տօնածառի լուսաւորման հանդիսութեան ներկայ էին Պեքաայի նահանգապետ Անթուան Սուլէյման, Այնճարի բարեզարդման յանձնախումբի նախագահ՝ Պրն. Ճորճ Փուչիկեան, Այնճարի քաղաքապետ՝ Վարդգէս Խօշեան, Միջին Պէքայի քաղաքապետութիւններու համախմբումի նախագահ Պրն. Մոհամմէտ Ալպասըթ, Մաքսէի քաղաքապետ Պրն. Աթէֆ Ալ Մայս, Այնճարի փոխ քաղաքապետ իրաւաբան Նազօ Անտէքեան, Պուրճ Համուտի փոխ քաղաքապետ, միութիւններու ներկայացուցիչներ եւ մեծ թիւով հայրենակիցներ:
Հ.Մ.Ը.Մ Այնճարի շեփորախումբի կատարողութեամբ քայլերգներու ունկընդրութենէն ետք, խօսք առաւ Այնճարի քաղաքապետ՝ Վարդգէս Խօշեան, որ բարի գալուստ մաղթեց ներկաներուն, եւ նշեց որ Այնճար միշտ ցոյց կու տայ ու կը վայելէ փոխադարձ յարգանք շրջակայ գիւղերէն:
Ապա, խօսք առաւ Պեքաայի նահանգապետ Անթուան Սուլէյման, որ իր խօսքին մէջ նախ շնորհաւորեց ներկաները Նոր Տարուան եւ Ս. Ծնունդի առիթով, ապա ան ըսաւ. «Հայ ազգը, որ առաջին քրիստոնեայ ազգն է աշխարհի վրայ, մինչեւ օրս կը քալէ Յիսուս Քրիստոսի ճամբուն վրայ, որ սիրոյ, ներողամտութեան եւ խաղաղ կեանքի ճամբան է:» Ան շարունակեց. «Հայ ժողովուրդը մշակոյթով հարոստ, արուեստի տէր ազգ մըն է, եւ մենք չենք զարմանար այսօր այս նախաձեռնութեան դիմաց, ուր ամբողջ Այնճարը կը փայլի տօնական մթնոլորտի մը մէջ:»
Ապա, ան պարգեւատրուեցաւ յուշանուէրով մը Այնճարի քաղաքապետութեան կողմէ:
Հանդիսութեան աւարտին, պաշտօնական պատուիրակութիւնն ու ներկաները մեկնեցան «Սարգիս Զէյթլեան» ժողովրդային կեդրոն, ուր հիւրասիրուեցան:
Պաշտօնական պատուիրակութիւնը նաեւ այցելեց Այնճարի Հ.Մ.Ը.Մ-ի համալիրը:
Հովանաւորութեամբ՝ Լ.Օ.Խ.-ի շրջանային վարչութեան, նախագահութեամբ՝ Այնճարի քաղաքապետութեան, Ուրբաթ, 1 Դեկտեմբեր, 2017-ին բացումը կատարուեցաւ Լ.Օ.Խ.-ի «Աղթամար» մասնաճիւղի վարչութեան կազմակերպած, Ամանորեայ տօնավաճառին, մասնաճիւղիս «Ֆիլհաննէսեան» կեդրոնէն ներս:
Բացման հանդիսութիւնը, աղօթքով եւ օրհնութեամբ, կատարեց Տէր Միւռոն Քհն. Աւէտիսեան: Ներկայ էին Պատուելի Յակոբ Ագպաշարեան, քաղաքապետ ընկ. Վարդգէս Խօշեան, Կարմիր Լեռ Կոմիտէի ներկայացուցիչ ընկ. Ժագ Տաղլեան, Լ.Օ.Խ.-ի Շրջանային Վարչութենէն, ընկերուհիներ՝ Մարօ Թազեան եւ Ցօղիկ Հաւաթեան, Լ.Օ.Խականներ եւ համակիրներ:
Տօնավաճառին իրնեց մասնակցութիւնը բերին, Աղթամար մասնաճիւղի ձեռարուեստի եւ ընկերային յանձնախումբերը, որոնք, իրենց ճարտար մատներով պատրաստած ձեռագործներ, յուշանուէրներ եւ հայկական ամանորեայ յատուկ ուտեստեղէններ վաճառեցին: Իրենց մասնակցութիւնը բերին նաեւ Այնճարէն այլ շնորհալի տիկիններ առիթին յատուկ արտադրութիւններով:
Վարչութեան անունով ընկհ. Լիզա Քէլէշեան Թիւմպէրեան բարի գալուստի խօսքերէն ետք, անդրադարցաւ հայկական ասեղնագործութեան եւ անոր պահպանման ու տարածման կարեւորութեան: Ապա Այնճարի քաղաքապետ՝ ընկ. Վարդգէս Խօշեան. դրուատեց հայ տիկնոջ դերը դարերու ընթացքին մինչեւ օրս: Որմէ ետք Պատուելի Յակոբ Ագպաշարեան նշեց իգական սերի կարեւորութեան մեր ընտանիքներէն ներս: Կարմիր Լեռ Կոմիտէի ներկայացուցիչ ընկ. Ժագ Տաղլեան, ի տես ձեռնարկի յաջողութեան շնորհաւորեց ընկերուհիները: Ի վերջոյ, Լ.Օ.Խ.-ի Շրջանային վարչութեան անունով, ընկհ. Ցօղիկ Հաւաթեան խօսք առնելով շեշտը դրաւ հաւաքական աշխատանքի դրական արդիւնքին վրայ եւ հաստատեց թէ, պատկան մարմինները միշտ թիկունք կանգնած են Լ.Օ.Խ.-ի աշխատանքներուն յաջողութեան:
Տօնավաճառը շարունակուեցաւ նաեւ Շաբաթ, 2 Դեկտեմբեր-ին ուր, վաճառքին առընթեր, Կաղանդ պապուկը իր օգնականներով այցելեց Այնճարի երեխաներուն: Ուրախ եւ խանդավառ մթնոլորտին մէջ ան 200 փոքրիկներու բաժնեց նուէրներ. մեծ անձեռոց եւ ուտեստեղէն, տրամադրուած Այնճարի քաղաքապետութենէն:
